السلام عليكم ورحمة الله وبركاته
راح أفشي أول سر
السر الي ماراح يصير سر بعد اليوم :)
سر جمال شعري ^_^ >> خفي علينا يا توبا
أنا زي أي بنت تحب الزين ههههه أصبغ شعري كثيييير على الأقل الأقل الأقل 3 مرات في السنة :$
وبحياتي مرتين سحبت لون بسس
وجهاز الاستريت والفير أصدقائي الصدوقين >> ماعرف للإستشوار علشان كذا ماقلته
ولا يخفى عليكم تأثير هالأشياء على الشعر إضافة إلى التغذية الزفت وفقر الدم >> تيرا را را :(
من شهر شوال وأنا حاسة أن شعري بدأ يضعف ويتساقط وشهر ذو القعدة صار يتساقط بشكل يبكي ما تتصورون كيف يطيح خصل خصل وربي :(
المهم سألت هذا دكتور بتويتر وجاوبني الله يجزاه الجنة
بس ماكان عندي وقت لنفسي ونسيت جوابه وحجيت ورجعت من الحج دمااااار شعري بشرتي أظافري وكل شيء ودي أتبرأ مني :(( الله يتقبل بس
المهم بس خفت انفلونزا الحج انطلفت لوايتس حبيبة قلبي والنهدي وشريت عدة العناية والحمد لله النتائج مبهرة اليوم راح أتكلم عن الشعر بس
بعدين بإذن الله راح أتكلم عن برنامج العناية ببشرة الوجه والجسم..
والآن راح أعلن عن سر إعادة الحيوية والجمال لشعري
صورة جماعية لمجموعة الحب والسعادة وكل شيء زين الحمد لله
نبدأ بالعلاج من الداخل
فيتامينات هير دال:
مكمل غذائي مزيج من الفيتامينات والمعادن يحتوي على الزنك والبيوتين والحديد >> ممتاز جداً وخصوصاً للي يعانون من فقر الدم
يُقال أنه يسمن وأقول أيه ممكن يسمنك بس شوي مرررة,, السمنة الحقيقة من فعايل يمينك ياروحي لا تظلمين الفيتامينات>> أقولها لنفسي ولكنّ عزيزاتي
ويُقال أنه ينبت الشعر في كل الجسم أمانة ما لاحظت هالشيء لأني مسوية ليزر..
مكان الشراء: صيدلية وايتس
السعر: 100 وعشرة أو عشرين والله ناسية
الفيتامين الثاني هو حبيب قلبي
أوميجا 3 (زيت السمك)
لازم لازم لازم تاخذونه ياعالم مفيد جداً
" أكدت البحوث العلمية الإرتباط القوي بين تناول زيت السمك وتدني مستوى الأمراض خصوصاً تصلب الشرايين والجلطات الدموية وإنخفاض ضغط الدم وتخفيض مستوى الدهون الثلاثية وإلتهابات المفاصل والحساسية والصدفية DHA هام جداً للوظائف الطبيعية للمخ والجهاز العصبي والنظر والسمع والغدة الكظرية. "
وأيضاً مفيد للبشرة والشعر.. >> أسألي أي دكتور عنها وشوفي إيش راح يقولك..
قال لي الصيدلي آخذ حبتين أوميجا 3 وحبة هير دال بعد الغداء يومياً
ليه أخترت هالنوع؟ صحيح في الصيدلية أنواع كثيرة زيت كبد الحوت بس جودتها تختلف تخيلي تاكلين شيء مامنه فايدة أووووم الغبنة
لا حبيبتي أنتبهي فيه تجارب في اليوتيوب عن أوميجا 3 وبايو مارين من أفضل الأنواع المهم إذا مالقيتيها شوفي اليوتيوبات واخذي من الأنواع الثانية الكويسة..
مكان الشراء: صيدلية زهرة الروضة
السعر: 65 ريال سعودي
نجي للمنتج الرهيب والاختراع العجيب
إثمدين هير بلس
مغذي ومعالج ومنبت ومطول للشعر يوقف التساقط من ثالث أسبوع تقريباً
صار لي استخدمه شهرين بالضبط ثلاث مرات في الأسبوع أدهن فروة رأسي بس وامسجها بخفيف وأخليه من 4 إلى 6 ساعات ثم أتروش بالشامبو الي بالصورة الي تحت
>> عاد ترا أحياناً ماعندي وقت أحطه وأستنى بس أحاول قد ما أقدر أستخدمه لأنه الحمد لله فادني عاد أنا طماعه أبي ينبت ويطول أكثر وأكثر وأكثر
مكوناته: زيت اللوز والجرجير والخروع والغار والسدر والقراص والمرمية مع الإثمد وفيتامين A & E
هل فيه ريحه؟ أنا مثلكم خايفة يكون له ريحة فتاكه بس الحمد لله ريحته خفيفة وهادية أمممم أحس بس الجرجير الي مبينة ريحته بس أمانة غير مزعجة الرائحة أبداً ويمكن ماحد يشمها إلا أنتِ
أبحثوا عنه بالنت بتتحمسون له كثير،، وهذا الموقع الرسمي للمنتج ويوصل لبرا المملكة
مكان الشراء : صيدليات النهدي
السعر: 350 ريال سعودي
المنتج الأخير
شامبو أنافيس
للشعر فاقد الحيوية ولتساقط الشعر يعني يقوي الشعر بشكل عام
جمييييييييل كأنه كريم مو شامبو من كثر ماهو لطيف حبيته وينظف الزيت بس مرتين اغسلي به شعرك علشان تضمنين أن شعرك نظف صححح..
شعري مصبوغ وكنت خايفة يلعب باللون هو والزيت بس الحمد لله ماخربوا لونه :)
مكان الشراء: صيدلية وايتس
السعر: 95 ريال سعودي
الخلاصة:
طبعاً ماراح أقول أن المنتج الفلاني هو السبب، لا كلها تكمل بعضها والنتيجة الحمد لله رائعة جداً جداً
جد جد ماشاء الله نفعتني ولله الحمد وقف التساقط وفيه طبقة نابته تهبل الله يحفظها والفراغات الي شفتها بعد الحج قربت تختفي
ولعلمكم جربت هالمنتجات أنا وصديقتي مع بعض والحمد لله شعرها نبت هي مشكلتها أصعب مني بس استفادت أحسن من أول بكثيرررر الحمد لله..
سبب هذا البوست: أنا أستفدت من هالشيء وحابة الكل يستفيد مثلي ويشهد الله أني مابالغت في ولا حرف ولا لي فائدة من كتابة هذا الكلام إلا تفريج كربة وحدة تعاني مثلي قبل كم شهر..
كونوا بخير ♥♥♥♥
